ଭାରତ ୨୮/୪ : ଫ୍ରାନସ ଠାରୁ ୨୬ ରାଫେଲ କିଣିବ ଭାରତ । ୬୩ ହଜାର କୋଟିର ଡିଲରେ ଆଜି ବାଜିବ ମୋହର। ଆଜି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ସହ ଭର୍ଚୁଆଲ ମିଟିଂରେ ଯୋଗଦେବେ ଫାନ୍ସ ପ୍ରତିରକ୍ଷା ମନ୍ତ୍ରୀ ସେବାଷ୍ଟିନ ଲେକର୍ନୁ । ଭାରତ ଫ୍ରାନସ ଠାରୁ ୨୬ଟି ରାଫେଲ ନେଭି ଜେଟ୍ ପାଇଁ ମେଗା ଡିଲ ଉପରେ ହେବ ଡିଲ । ଦୁଇ ଦେଶ ମଧ୍ୟରେ ପ୍ରତିରକ୍ଷା ଡିଲ ନେଇ ସ୍ବାକ୍ଷର ହେବ। ୨୬ଟି ରାଫେଲ ମଧ୍ୟରେ ୨୨ଟି ସିଙ୍ଗଲ ସିଟର ଓ ୪ଟି ଟ୍ବିନ ସିଟର ରାଫେଲ ମରିନ ଜେଟ ମିଳିବ। ଡିଲରେ ମୋହର ବାଜିବା ପରେ ୨୦୨୮ରୁ ୨୦୨୯ ମଧ୍ୟରେ ବିମାନର ଡେଲିଭରୀ ଆରମ୍ଭ ହେବ । ୨୦୩୧ ସୁଦ୍ଧା ଭାରତୀୟ ନୌସେନାରେ ସମସ୍ତ ୨୬ଟି ରାଫେଲ ସାମିଲ ହେବ ବୋଲି ଆଶା ରହିଛି ।
ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବସିଥିବା କ୍ୟାବିନେଟ କମିଟି ଅନ ସିକ୍ୟୁରିଟିଜ ଏହି ଡିଲକୁ ମଞ୍ଜୁରୀ ପ୍ରଦାନ କରିଛି। ପୂର୍ବରୁ ୧୬ ହଜାର କୋଟି ବିନିମୟରେ ଏୟାର ଫୋର୍ସ ପାଇଁ ଫ୍ରାନ୍ସ ଠାରୁ ୩୬ଟି ରାଫେଲ କିଣିଥିଲା ଭାରତ । ଏଥର ନୌସେନାର ଶକ୍ତି ବୃଦ୍ଧି କରିବ ରାଫେଲ ଫାଇଟର । ସ୍ବଦେଶୀ ଜ୍ଞାନକୌଶଳରେ ନିର୍ମିତ ଏୟାରକ୍ରାଫ୍ଟ କ୍ୟାରିଅର ଆଇଏନଏସ୍ ବିକ୍ରାନ୍ତ ଡେକ୍ ରେ ମୁତୟନ ହେବ ରାଫେଲ ।
ବହୁମୁଖୀ ଆକ୍ରମଣ କ୍ଷମତା ଥିବା ରାଫେଲ ଫାଇଟର ଆଣବିକ ଅସ୍ତ୍ର ବହନ କରିବାର କ୍ଷମତା ରଖିଛି । ପ୍ରାୟ ୧୮ଶହ ୫୦ କିଲୋମିଟର ଦୂରକୁ ଲକ୍ଷ୍ୟ ଭେଦ କରିପାରିବ । ଏବେ ଭାରତୀୟ ନୌସେନା ପାଖରେ ରହିଛି MiG-29-K। ରୁଷ ଠାରୁ ଏହି ନେଭି ଜେଟ୍ କିଣିଥିଲା ଭାରତ। ଭାରତର ଦ୍ବିତୀୟ ପୁରୁଣା ଏୟାରକ୍ରାଫ୍ଟ କ୍ୟାରିଅର ଆଇଏନଏସ ବିକ୍ରମାଦିତ୍ୟରୁ ମିଗ୍ ଅପରେସନ୍ ଜାରି ରହିବ । ଭାରତ ପାଖରେ ଏବେ ୪୦ଟି ମିଗ୍ ଫାଇଟର ରହିଛି ।
