ତୁର୍କୀ ୧୪/୬ : ଅପରେସନ ସିନ୍ଦୂର ପରେ ଏବେ ସାମାଜିକ ଗଣମାଧ୍ୟମରେ ତୁର୍କୀକୁ ବ୍ୟାନ୍ ଟ୍ରେଣ୍ଡ୍ ଆରମ୍ଭ ହୋଇଯାଇଛି । ଭାରତ ପାକିସ୍ତାନ ତିକ୍ତତା ମଧ୍ୟରେ ପାକିସ୍ତାନକୁ ତୁର୍କୀ ଖୋଲା ସମର୍ଥନ କରିଥିଲା । ତୁର୍କୀର ଏହି ସମର୍ଥନ ନେଇ ଭାରତରେ ତୁର୍କୀରୁ ଆସୁଥିବା ସାମଗ୍ରୀକୁ ବ୍ୟାନ୍ କରିବା ନେଇ ସାମାଜିକ ଗଣମାଧ୍ୟମରେ ଅପିଲ୍ ହେଉଛି । ତୁର୍କୀରୁ ଆସୁଥିବା ସେଓକୁ ପୁଣେ ସହରବାସୀ ବୟକଟ୍ କରିଛନ୍ତି ।
ଏହା ଦ୍ଵାରା ପ୍ରାୟ ୧୨ ଶହ କୋଟି ଟଙ୍କାର କ୍ଷତି ତୁର୍କୀକୁ ସହିବାକୁ ପଡିବ । ଏହି ବୟକଟ ଫଳରେ ତୁର୍କୀର କ୍ଷତି ହେବା ସହ ଭାରତୀୟ ସେନାର ମନୋବଳ ମଧ୍ୟ ବୃଦ୍ଧି ପାଇବ ।ତୁର୍କୀ ସାମଗ୍ରୀକୁ ବ୍ୟାନ୍ ସହ ଏବଂ କାମ ପାଇଁ ତୁର୍କୀ ଯାଉଥିବା ଲୋକଙ୍କୁ ଅନ୍ୟ ବିକଳ୍ପ ଖୋଜିବା ପାଇଁ ଅପିଲ୍ କରାଯାଉଛି । ମୋଟାମୋଟି ଭାବେ କହିବାକୁ ଗଲେ ତୁର୍କୀ ସହ ବ୍ୟବସାୟ ଏବଂ ଅନ୍ୟାନ୍ୟ ସମସ୍ତ ସମ୍ପର୍କ ବନ୍ଦ କରିବା ପାଇଁ ସାମାଜିକ ଗଣମାଧ୍ୟମରେ ଅନୁରୋଧ କରାଯାଉଛି । ସମସ୍ତେ ଏହି ଦାବିକୁ ପସନ୍ଦ କରିବା ସହ ସେୟାର କରୁଛନ୍ତି ।
ଏହା ସହ ସମସ୍ତେ ତୁର୍କୀ ବଦଳରେ ଗ୍ରୀସକୁ ବୁଲିବାକୁ ଯିବାକୁ ପସନ୍ଦ କରିବା ଆରମ୍ଭ କରିଛନ୍ତି । ଗ୍ରୀସ ତୁର୍କୀର ପ୍ରତିଦ୍ଵନ୍ଦୀ ସହ ଭାରତର ଭଲ ବନ୍ଧୁ ମଧ୍ୟ । ତେଣୁ ଏକ୍ସରେ ତୁର୍କୀ ବଦଳରେ ଗ୍ରୀସକୁ ବୁଲିବାକୁ ଯିବାକୁ ନେଇ ଅନେକ ପୋଷ୍ଟ ଭାଇରାଲ ହେଉଛି ।
