ଆଇପିଏଲ ୨୬/୫ : ଆଇପିଏଲ୍ ୨୦୨୫ରେ ତାର ଶେଷ ମ୍ୟାଚ୍ ଖେଳିଛି ଚେନ୍ନାଇ ସୁପର କିଙ୍ଗସ ଆଉ ଚମତ୍କାର ବିଜୟ ହାସଲ କରିଛି । ପଏଣ୍ଟ ତାଲିକା ଶୀର୍ଷରେ ଥିବା ଗୁଜରାଟ ଟାଇଟନ୍ସକୁ ୮୩ ରନରେ ହରାଇଛି । ଧୋନିଙ୍କ ଟିମ୍ ପାଇଁ ଚଳିତ ବର୍ଷ ଅତି ଖରାପ ଥିଲା । ସେମାନେ ମୋଟ ୧୪ଟି ମ୍ୟାଚ ଖେଳି ୪ଟି ବିଜୟ ସହ ୮ ପଏଣ୍ଟ ପାଇ ତାଲିକାର ସବା ଶେଷ ଅର୍ଥାତ୍ ଦଶମ ସ୍ଥାନରେ ରହିଛନ୍ତି । ଅନ୍ୟପକ୍ଷରେ ଗୁଜରାଟ ଏହି ପରାଜୟ ସତ୍ତ୍ବେ ପ୍ରଥମ ସ୍ଥାନ ବଜାୟ ରଖିଛି । ଶୁବମନ ଗିଲଙ୍କ ଦଳ ୧୪ଟି ମ୍ୟାଚରୁ ୯ଟି ବିଜୟ ସହ ୧୮ ପଏଣ୍ଟ ଲାଭ କରିଛି । ତେବେ ପଞ୍ଜାବ କିଙ୍ଗସ ଓ ରୟାଲ ଚାଲେଞ୍ଜର୍ସ ବେଙ୍ଗାଲୁରୁର ଗୋଟିଏ ଲେଖାଏଁ ମ୍ୟାଚ୍ ବାକି ଥିବା ବେଳେ ସେମାନେ ସମାନ ୧୭ ପଏଣ୍ଟରେ ଅଛନ୍ତି । ଯିଏ ଜିତିବ ୧୯ ପଏଣ୍ଟ ସହ ତାଲିକା ଶୀର୍ଷରେ ପହଞ୍ଚିବ ।
ଆଜିର ପ୍ରଥମ ମ୍ୟାଚରେ ଚେନ୍ନାଇ ଟସ୍ ଜିତି ପ୍ରଥମେ ବ୍ୟାଟିଂ କରିଥିଲା । କନୱେ ଓ ବ୍ରେଭିସଙ୍କ ଅର୍ଦ୍ଧଶତକ ବଳରେ ୫ ୱିକେଟରେ ୨୩୦ ରନ୍ କରିଥିଲା । କନୱେ ୫୨, ବ୍ରେଭିସ ୫୭, ଆୟୁଷ ମାହାତ୍ରେ ୩୪, ଉର୍ଭିଲ ପଟେଲ ୩୭ ଏବଂ ଜାଡେଜା ଅପରାଜିତ ୨୧ ରନ୍ କରିଥିଲେ ।ପରେ ଗୁଜରାଟ ଦଳ ଯେମିତି ତାସ୍ ଘର ଭଳି ଭୁଶୁଡ଼ି ପଡ଼ିଥିଲା । ଜାଡେଜା, ଅନଶୁଲ କମ୍ବୋଜ ଏବଂ ନୁର ଅହମ୍ମଦ ବଢ଼ିଆ ବୋଲି କରି ମାତ୍ର ୧୪୭ ରନରେ (୧୮.୩ ଓଭର) ଗୁଜରାଟକୁ ଅଲଆଉଟ୍ କରି ଦେଲେ । ଫର୍ମରେ ଥିବା ସାଇ ସୁଦର୍ଶନ ସର୍ବାଧିକ ୪୧ ରନ କରିଥିବା ବେଳେ ଆଉ କାହାର ପ୍ରଦର୍ଶନ ଭଲ ନଥିଲା । ଜାଡେଜା ୨ଟି ଏବଂ କମ୍ବୋଜ ଓ ନୁର ୩ଟି ଲେଖାଏଁ ୱିକେଟ୍ ନେଇଥିଲେ ।ମ୍ୟାଚ୍ ଶେଷରେ ଅଧିନାୟକ ଧୋନି କହିଥିଲେ ଯେ ଏହି ସିଜିନ୍ ତାଙ୍କ ଦଳ ପାଇଁ ଆଦୌ ଭଲ ନଥିଲା ତେବେ ଶେଷ ମ୍ୟାଚ୍ ଜିତି ବେଶ୍ କିଛି ଆତ୍ମସନ୍ତୋଷ ମିଳିଛି ।