ବାହାନଗା ୨/୬ : ମନରୁ ଲିଭିନି ସେହି କଳା ରାତିର କଳା କାହାଣୀ । ଜୁନ ୨ ତାରିଖ, ୨୦୨୩ ସନ୍ଧ୍ୟା ୭ଟା । ହାୱାଡାରୁ ଚେନ୍ନାଇ ଅଭିମୁଖେ ଯାଉଥିବା କରମଣ୍ଡଳ ଏକ୍ସପ୍ରେସ । ରାତିର ଅନ୍ଧକାରକୁ ଚିରି ଟ୍ରାକରେ ଛୁକ ଛୁକ ହୋଇ ଆସୁଥିଲା କରମଣ୍ଡଳ ଏକ୍ସପ୍ରେସ । ଅନେକ ସ୍ବପ୍ନ ନେଇ ଟ୍ରେନରେ ଯାତ୍ରା କରୁଥିଲେ ଯାତ୍ରୀ । ଟ୍ରେନରେ କାହାର ପୁରା ପରିବାର ଥିଲା ତ କାହାର ସ୍ବାମୀ, କାହାର ସାଙ୍ଗ, କାହାର ପୁଅ, କାହାର ଝିଅ କାହାର ବାପା ମାଆ ଯାତ୍ରା କରୁଥିଲେ । କିନ୍ତୁ ସେମାନେ ଜାଣିନଥିଲେ ଏହା ତାଙ୍କର ଶେଷ ଯାତ୍ରା ହୋଇପାରେ । ଟ୍ରେନ ତାର ଗନ୍ତବ୍ୟସ୍ଥଳରେ ପହଞ୍ଚିବା ପୂର୍ବରୁ ବାହାନଗାରେ ଅଟକିଯାଇଥିଲା । ଏହାପରେ ଯାହା ଘଟିଲା ତାହା ପୁରା ବିଶ୍ବକୁ ଦୋହଲାଇ ଦେଇଥିଲା ।
ହାୱଡାରୁ ଆସୁଥିଲା କରମଣ୍ଡଳ ଏକ୍ସପ୍ରେସ, ଅନ୍ୟପଟୁ ବେଙ୍ଗାଲୁରୁରୁ ହାୱଡା ଯାଉଥିଲା ଯଶୋବନ୍ତପୁର ସୁପରଫାଷ୍ଟ ଏକ୍ସପ୍ରେସ । ବାହାନଗା ଠାରେ ପୂର୍ବରୁ ଠିଆ ହୋଇଥାଏ ଲୁହା ବୋଝେଇ ମାଲବାହୀ ଟ୍ରେନ । ଘଣ୍ଟାକୁ ୧୨୮ କିଲୋମିଟର ପ୍ରତି ବେଗରେ ଆସୁଥିବା କରମଣ୍ଡଳ ଟ୍ରେନକୁ ବାଲେଶ୍ଵର ପରେ ଲୁପ ଲାଇନରେ ଯିବାକୁ ସିଗନାଲ୍ ମିଳିଥିଲା । କିନ୍ତୁ ସେହି ଲାଇନରେ ପୂର୍ବରୁ ମାଲବାହୀ ଟ୍ରେନଟି ଛିଡା ହୋଇଥିଲା । ଯେଉଁଥିପାଇଁ ବାହାନାଗରେ ଉଭୟ ଟ୍ରେନ ମଧ୍ୟରେ ହୋଇଥିଲା ଧକ୍କା । ଏହି ଦୁର୍ଘଟଣାରେ କରମଣ୍ଡଳର ୨୧ଟି ବଗି ଓଲଟି ପଡିଥିଲା ଆଉ ସେଥିରୁ ୩ଟି ରେଲୱେ ଟ୍ରାକରେ ପଡିଥିଲା । ସେପଟେ ଅନ୍ୟ ପଟରୁ ଆସୁଥିବା ଯଶୋବନ୍ତପୁର ସୁପରଫାଷ୍ଟ ଏକ୍ସପ୍ରେସ୍ ଧକ୍କା ହୋଇଥିଲା ।
ଏହି ଧକ୍କା ଫଳରେ ଯଶୋବନ୍ତପୁର ଏକ୍ସପ୍ରେସର ମଧ୍ୟ କିଛି ବଗି ଲାଇନଚ୍ୟୁତ ହୋଇଯାଇଥିଲା। ଶବ୍ଦ ଶୁଣି ଧାଇଁ ଆସିଥିଲେ ବାହାନଗାବାସୀ । କିଏ ଟ୍ରେନ ତଳେ ଚାପି ହୋଇ ରହିଯାଇଥିଲା ତ ଆଉ କାହାର ମୁଣ୍ଡ ନଥିଲା । ଆଉ କିଏ ଜୀବନ ବଞ୍ଚାଇବା ପାଇଁ ଚିତ୍କାର କରୁଥିଲା । ବିଭିନ୍ନ ସ୍ଥାନରୁ ଲୋକମାନେ ଆସି ଉଦ୍ଧାର କାର୍ୟ୍ୟରେ ଲାଗିପଡିଥିଲେ । ଖବର ପ୍ରଚାର ହେଉ ହେଉ ସଙ୍ଗେ ସଙ୍ଗେ ରେଳ ଲାଇନ ପାଖରେ ଲାଗିଯାଇଥିଲା ଲୋକଙ୍କ ଭିଡ଼ । ଯିଏ ଯେମିତି ପାରିଥିଲା ଆହତ ଲୋକମାନଙ୍କୁ ଉଦ୍ଧାର କରିବାରେ ଲାଗି ପଡିଥିଲେ । ସ୍ଥାନୀୟ ଲୋକଙ୍କ ଠାରୁ ଆରମ୍ଭ କରି ବିଭିନ୍ନ ସ୍ବେଚ୍ଛାସେବୀ ସଂଗଠନମାନଙ୍କ ଦ୍ୱାରା ଉଦ୍ଧାର କାର୍ୟ୍ୟ ଚାଲିଥିଲା । ସ୍ଥଳସେନା, ବାୟୁସେନା, ଅଗ୍ନିଶମ ବିଭାଗ, ଓଡ୍ରାଫ୍ ଟିମ୍, ଏନ୍ ଡିଆରଏଫ୍ ଟିମ୍ ସହ ମୋଟ ୧୨ ଶହରୁ ଅଧିକ ପୋଲିସ କର୍ମଚାରୀ ଉଦ୍ଧାର କାର୍ୟ୍ୟରେ ଲାଗି ପଡ଼ିଥିଲେ । ବିପତ୍ତି ସମୟରେ ବାଲେଶ୍ବରବାସୀ ଯେଉଁଭଳି କାର୍ୟ୍ୟ କରିଥିଲେ ତାହା ଉଦାହରଣ ସୃଷ୍ଟି କରିଥିଲା । ତେବେ ଏହି ଭୟଙ୍କର ଦୁର୍ଘଟଣାକୁ ଦୁଇ ବର୍ଷ ପୁରିଥିବା ବେଳେ ସେହି କଥା ମନେ ପଡିଲେ ଆଜି ବି ଲୋକଙ୍କ ଲୋମ ଟାଙ୍କୁରି ଉଠେ । କିଛି ମୃତ ବ୍ୟକ୍ତିଙ୍କ କୌଣସି ପରିଚୟ ଆଜି ବି ମିଳିପାରି ନାହିଁ ।