ଗଞ୍ଜାମ ୧୮/୦୪ : ପ୍ରକୃତିର ଅନନ୍ୟ ବରଦାନ ହେଉଛି ବିରଳ ଅଲିଭ ରିଡଲେ ସାମୁଦ୍ରିକ କଇଁଛ । ଶୀତଦିନ ଆରମ୍ଭ ହେଲେ ହଜାର ହଜାର ମାଇଲ ଦୂରରୁ ଓଡିଶା ଉପକୂଳକୁ ଛୁଟି ଆସିଥାନ୍ତି । ପ୍ରତିବର୍ଷ ଏହି କଇଁଛମାନେ ପ୍ରଶାନ୍ତ ମହାସାଗରର ଗଭୀର ଜଳରାଶିରୁ ଓଡିଶା ଉପକୂଳକୁ ଆସି ଅଣ୍ଡା ଦେଇ ଚାଲି ଯାଆନ୍ତି । ତାପରେ ବାଲିରୁ ଆପେ ଆପେ ଛୁଆ ବାହାରି ଧୀରେ ଧୀରେ ସମୁଦ୍ର ଗର୍ଭକୁ ଚାଲି ଯାଆନ୍ତି । ହୁଏତ ପୁଣି ଏମାନେ ବଡ଼ ହୋଇ ଏଠାକୁ ଆସନ୍ତି ଅଣ୍ଡା ଦେବା ପାଇଁ । ସେହିଭଳି ଚଳିତ ବର୍ଷ ମଧ୍ୟ ବାଲିରୁ ଛୁଆ ବାହାରି ସମୁଦ୍ର ମୁହାଁ ।
ଅଲିଭ ରିଡଲେ କଇଁଛଙ୍କ ଏହି ପ୍ରାକୃତିକ କାର୍ଯ୍ୟ ଯୁଗ ଯୁଗର । ଯାହାର ରହସ୍ୟ ଭେଦିବାକୁ ଆଜି ପର୍ଯ୍ୟନ୍ତ ବି ସକ୍ଷମ ହୋଇ ନାହାନ୍ତି କୌଣସି ବିଶେଷଜ୍ଞ କିମ୍ବା ପ୍ରାଣୀ ବିଜ୍ଞାନୀ । ହେଲେ ଏ କଇଁଛ ଛୁଆଙ୍କର ବାହୁଡିବା ବେଳର ଦୃଶ୍ୟ ଏତେ ଆକର୍ଷଣୀୟ ଯେ ଦେଖିଲେ ଆଖି ଲାଖିଯିବ । ଗଞ୍ଜାମ ଜିଲ୍ଲାର ଋଷିକୁଲ୍ୟା ମୁହାଁଣ ଅଞ୍ଚଳ ସମୁଦ୍ର ବେଳାଭୂମିରୁ ଅଲିଭ ରିଡେଲ ସାମୁଦ୍ରିକ କଇଁଛ ଅଣ୍ଡାରୁ ଛୁଆ ଫୁଟିବା ଆରମ୍ଭ ହୋଇଛି । ଦୈନିକ ଏବେ ଅଣ୍ଡାରୁ ଛୁଆ ବାହାରି ସମୁଦ୍ର ମୁହାଁ ହେଉଛନ୍ତି ଏହି କୁନି ଶାବକ ।
ସେଥି ମଧ୍ୟରୁ ବାଟବଣା ହୋଇ ଉପର ମୁହାଁ ହେଉଥିବା କୁନି କୁନି ଶାବକ ମାନଙ୍କୁ ଉଦ୍ଧାର କରି ସମୁଦ୍ର ମଧ୍ୟରେ ଛାଡ଼ୁଛନ୍ତି ବହୁ ସ୍ବେଛାସେବୀ । ଏପରିକି କିଛି ସ୍କୁଲ ଛାତ୍ରଛାତ୍ରୀ ମାନେ ମଧ୍ୟ ଏଥିରେ ସାମିଲ ହୋଇଥିବା ଦେଖିବାକୁ ମିଳିଥିଲା । ଗତ ନଭେମ୍ବରରୁ ଜାନୁଆରୀରେ ସମୁଦ୍ରରେ ମିଳନ ପରେ ଋଷିକୁଲ୍ୟା ମୁହାଣ ନିକଟରେ ଦୁଇଟି ପର୍ଯ୍ୟାୟରେ ଗଣ ମା ଅଲିଭ ରିଡିଲେ ମାନେ ଅଣ୍ଡାଦାନ କରିଥିଲେ । ଅଣ୍ଡା ଦାନର ୪୫ ଦିନ ପରେ ଛୁଆ ଫୁଟିବା ଆରମ୍ଭ ହୋଇଛି ।
ସୁଦୂର ଦେଶରୁ ହଜାର ହଜାର କିଲୋମିଟର ଅତିକ୍ରମ କରି ଏନ୍ତୁଡିଶାଳ ଗଞ୍ଜାମ ଋଷିକୁଲ୍ୟା ମୁହାଣ ନିକଟକୁ ଆସି ଅଣ୍ଡାଦାନ କରି ବାଲିରେ ପୋତି ମା ଅଲିଭ ରିଡେଲ କାଇଁଚ ସମୁଦ୍ରରେ ଚାଲି ଯାଇଥିଲା । ଆଉ ଏବେ ଛୁଆ ବାହାରିବା ପରେ କୁନି ଶାବକ ମାନେ ମଧ୍ୟ ସମୁଦ୍ର ମୁହାଁ ହୋଇଥିବା ଦେଖିବାକୁ ମିଳିଛି । ଚଳିତ ବର୍ଷ ରେର୍କଡ ସଂଖ୍ୟାକ ଦୁଇ ପର୍ଯ୍ୟାୟ ରେ ୯ ଲକ୍ଷ ୪ ହଜାର ୫୧୭ ଗଣ ଅଣ୍ଡାଦାନ ହୋଇଥିଲା । ଆଉ ଏହି ଦୃଶ୍ୟକୁ ଦେଖିବାକୁ ବହୁ ଜିଲ୍ଲା ଏବଂ ଜିଲ୍ଲା ବାହାରୁ ବହୁ ପର୍ଯ୍ୟଟକ ମାନେ ଏଠାକୁ ଆସିଥିବା ମଧ୍ୟ ଦେଖିବାକୁ ମିଳିଛି ।
ତେବେ ସମୁଦ୍ର ମଧ୍ୟକୁ ଏହି ଶାବକମାନେ ଯାଉଥିବା ସମୟରେ ଏକ ସୁନ୍ଦର ଅଭିନବ ଦୃଶ୍ୟ ଦେଖିବାକୁ ମିଳିଥାଏ । କୁନି କୁନି ଗୋଡରେ ଛୋଟ ଛୋଟ ପାଦ ପକାଇ ସମୁଦ୍ର ଭିତରକୁ ଅଗ୍ରସର ହେଉଥିବା ଏହି ଶାବକମାନେ ଏକ ନୂଆପିଢିର ସ୍ୱପ୍ନକୁ ସାକାର କରିବାକୁ ବାହାରି ଯାଆନ୍ତି । ଜନ୍ମଭୂମିକୁ ବିଦାୟ ଦେଇ ଚାଲିଯାନ୍ତି ହଜାର ହଜାର ମାଇଲ ଦୂରକୁ ।