ଭାରତ ଟେଷ୍ଟ ମାନ୍ୟତାରେ ଚତୁର୍ଥ ସ୍ଥାନକୁ ଖସିଲା

ଭାରତୀୟ କ୍ରିକେଟ୍ ଦଳ ଦିନିକିଆ ଏବଂ ଟ୍ୱେଣ୍ଟି -୨୦ରେ ଏକନମ୍ବର ମାନ୍ୟତା ବଜାୟ ରଖିଛି। ହେଲେ ଆଇସିସି ଟେଷ୍ଟ୍ ମାନ୍ୟତାରେ ଚତୁର୍ଥ ସ୍ଥାନକୁ ଖସି ଯାଇଛି। ଟେଷ୍ଟ୍ ମାନ୍ୟତାରେ ଅଷ୍ଟ୍ରେଲିଆ‌ ତା’ର ଆଧିପତ୍ୟ ଜାରି ରଖିଛି। ସୋମବାର ଆଇସିସି ଦ୍ଵାରା ପ୍ରକାଶିତ ବାର୍ଷିକ ମାନ୍ୟତାରେ ୨୦୨୩ ବିଶ୍ବକପ୍ ଫାଇନା‌ଲିଷ୍ଟ ଭାରତ ଚାମ୍ପିଅନ୍ସ ଟ୍ରଫି ଜିତିବା ପରେ ପ୍ରଥମ ସ୍ଥାନରେ ନିଜ ସ୍ଥିତିକୁ ଆହୁରି ସୁଦୃଢ଼ କରି ନେଇଛି। ଚାମ୍ପିଅନ୍ସ ଟ୍ରଫି ଉପବିଜେତା ନ୍ୟୁଜିଲାଣ୍ଡ  ଦ୍ଵିତୀୟ ସ୍ଥାନରେ ରହିଥିଲା ବେଳେ ଅଷ୍ଟ୍ରେଲିଆ ତୃତୀୟ, ଶ୍ରୀଲଙ୍କା ଚତୁର୍ଥ, ପାକିସ୍ତାନ ପଞ୍ଚମ, ଦକ୍ଷିଣ ଆଫ୍ରିକା ଷଷ୍ଠ, ଆଫଗାନିସ୍ତାନ ସପ୍ତମ, ଇଂଲଣ୍ଡ ଅଷ୍ଟମ, ୱେଷ୍ଟଇଣ୍ଡିଜ୍ ନବମ ଓ ବାଂଲାଦେଶ ଦଶମ ସ୍ଥାନରେ ରହିଛି। ଟ୍ୱେଣ୍ଟି -୨୦ରେ ବିଶ୍ଵ ବିଜେତା ଭାରତ ଶୀର୍ଷ ସ୍ଥାନ ଦଖଲ କରିଥିଲା ବେ‌ଳେ ଅଷ୍ଟ୍ରେଲିଆ ଦ୍ଵିତୀୟ ସ୍ଥାନରେ ରହିଛି। ପ୍ରଥମ ଥର ଲାଗି ଆଇସିସି ଟ୍ୱେଣ୍ଟି -୨୦ ମାନ୍ୟତାରେ ବିଶ୍ଵର ୧୦୦ଟି ଦେଶକୁ ସାମିଲ କରାଯାଇଛି। ଏହି ତାଲିକାରେ ଇଂଲଣ୍ଡ ତୃତୀୟ ଏବଂ ନ୍ୟୁଜିଲାଣ୍ଡ, ୱେଷ୍ଟଇଣ୍ଡିଜ୍ ଓ ଦକ୍ଷିଣ ଆଫ୍ରିକା ଯଥାକ୍ରମେ ଚତୁର୍ଥ, ପଞ୍ଚମ ଓ ଷଷ୍ଠ ସ୍ଥାନରେ ରହିଛନ୍ତି। ଟେଷ୍ଟ୍ ମାନ୍ୟତାରେ ଅଷ୍ଟ୍ରେଲିଆ ଓ ଇଂଲଣ୍ଡ ପଛକୁ ଦକ୍ଷିଣ ଆଫ୍ରିକା ଓ ଭାରତ ରହିଛନ୍ତି। ନ୍ୟୁଜିଲାଣ୍ଡ, ଶ୍ରୀଲଙ୍କା, ପାକିସ୍ତାନ, ୱେଷ୍ଟଇଣ୍ଡିଜ୍, ବାଂଲାଦେଶ ଓ ଜିମ୍ବାୱେକୁ ନେଇ ଶୀର୍ଷ ୧୦ ଗଠିତ ହୋଇଛି।