ଓଡ଼ିଶା ୦୧ /୦୩ :ଏପ୍ରିଲରୁ ଜୁନ୍ ବର୍ଷିବ ନିଆଁ । ବେଶି ଛଟପଟ କରାଇବ ଏପ୍ରିଲ ତାତି । ସ୍ୱାଭାବିକଠାରୁ ଅଧିକ ଲମ୍ବିବ ଗ୍ରୀଷ୍ମ ପ୍ରବାହ ଦିନ ସଂଖ୍ୟା । ବର୍ଷା ସମ୍ଭାବନା ବି କମ୍ । ଏମିତି ପୂର୍ବାନୁମାନ ଚିତ୍ର ଦେଖାଇଛି ଭାରତୀୟ ପାଣିପାଗ ବିଭାଗ । ଅନ୍ୟପଟେ ପାଣିପାଗ ବିଶେଷଜ୍ଞଙ୍କ ତାଜା ଆକଳନ ହେଲା, କାଳବୈଶାଖୀ ବର୍ଷା ସମ୍ଭାବନା ଥିବାରୁ ଏବେ ରାଜ୍ୟରେ ଗରମ ପ୍ରକୋପ କମ୍ ରହିବ । ମାତ୍ର ୮ ତାରିଖରୁ ହୁ ହୁ ହୋଇ ବଢ଼ିବ ତାପମାତ୍ରା । ତାତି ଏତେ ବଢ଼ିବ ଯେ ଆସନ୍ତା ୯/୧୦ ତାରିଖବେଳକୁ ପାରଦ ୪୪-୪୫ ଡିଗ୍ରୀ ସେଲସିୟସ୍ ଛୁଇଁପାରେ ।
ଆଇଏମ୍ଡି ମହାନିର୍ଦ୍ଦେଶକ ଡା. ମୃତ୍ୟୁଞ୍ଜୟ ମହାପାତ୍ର ସୋମବାର ଏପ୍ରିଲରୁ ଜୁନ୍ ମାସ ଯାଏଁ ଗ୍ରୀଷ୍ମ ଅବଧିର ପୂର୍ବାନୁମାନ ଜାରି କରିଛନ୍ତି । ଏହି ଆକଳନରୁ ଜଣାପଡ଼ିଛି, ଏପ୍ରିଲ, ମେ’ ଓ ଜୁନ୍ ମାସରେ ଦେଶର ଅଧିକାଂଶ ସ୍ଥାନରେ ଦିନ ତାପମାତ୍ରା ସ୍ୱାଭାବିକଠାରୁ ଅଧିକ ରହିପାରେ । ଏ ବର୍ଷ ବି ଓଡ଼ିଶାରେ ସ୍ୱାଭିବାକଠାରୁ ଅଧିକ ଗରମ ରହିବ । ଏପ୍ରିଲ ମାସରେ ସାଂଘାତିକ ତାତି ପ୍ରକୋପ ଛଟପଟ କରିବ ଓଡ଼ିଶାକୁ ।
ଏପ୍ରିଲ ମାସର ସମ୍ଭାବ୍ୟ ତାତି ପ୍ରକୋପ ନେଇ ପୂରା ଓଡ଼ିଶାକୁ ଲାଲ୍ ଚିତ୍ରରେ ଚିହ୍ନଟ କରିଛି ଆଇଏମ୍ଡି । ଦିନ ତାପମାତ୍ରା ଅସହ୍ୟ ହେବ ଉପକୂଳ, ଦକ୍ଷିଣ, ଉତ୍ତର, ଆଭ୍ୟନ୍ତରୀଣ ଏବଂ ପଶ୍ଚିମ ଓଡ଼ିଶାରେ । ରାତିରେ ମଧ୍ୟ ନିସ୍ତାର ମିଳିବନି ଗରମରୁ । ସର୍ବନିମ୍ନ ତାପମାତ୍ରା ସ୍ୱାଭାବିକଠାରୁ ଅଧିକ ରହିବ । ଏପ୍ରିଲରେ ସାଧାରଣତଃ ୩ ଦିନ ଗ୍ରୀଷ୍ମ ପ୍ରବାହ (ହିଟ୍ ୱେଭ୍) ରହିବା କଥା । ମାତ୍ର ଏ ବର୍ଷ ହିଟ୍ ୱେଭ୍ ଦିନ ସଂଖ୍ୟା ସ୍ୱାଭାବିକଠାରୁ ୪ରୁ ୫ ଦିନ ଅଧିକ ରହିପାରେ । ଅର୍ଥାତ୍ ଏପ୍ରିଲରେ ହିଟ୍ ୱେଭ୍ ଦିନ ସଂଖ୍ୟା ୭/୮ ଦିନ ରହିପାରେ ।
ଚିନ୍ତାର ବିଷୟ ହେଲା, ଏପ୍ରିଲରେ ବର୍ଷା ବି କମ୍ ରହିବ । କେବଳ ଉପକୂଳ ଓଡ଼ିଶା ସମୁଦ୍ର ସଂଲଗ୍ନ କିଛି ଅଞ୍ଚଳରେ କାଳବୈଶାଖୀ ବର୍ଷା ଅଧିକ ହୋଇପାରେ । ହେଲେ ବାକି ସବୁଠି ବର୍ଷା କମ୍ ରହିବ । ଏପ୍ରିଲରୁ ଜୁନ୍ ପର୍ଯ୍ୟନ୍ତ ରାଜ୍ୟରେ ଗ୍ରୀଷ୍ମ ପ୍ରକୋପ ସ୍ୱାଭାବିକଠାରୁ ଅଧିକ ରହିବ । ଏହି ୪ ମାସରେ ଯେତିକି ଗ୍ରୀଷ୍ମ ପ୍ରବାହ ଦିନ ଅନୁଭୂତ ହୋଇଥାଏ, ଏଥର ତା’ଠାରୁ ଅଧିକ ରହିବା ଆଶଙ୍କା ଅଛି । ୨୦୨୩ ଓ ୨୦୨୪ରେ ଏପ୍ରିଲ ମାସରେ ତାତି ରେକର୍ଡ ଭାଙ୍ଗିଥିଲା ଓଡ଼ିଶା ।
ମେ’ରେ ଗରମ ରହିଲେ ମଧ୍ୟ କାଳବୈଶାଖୀ ଅଧିକ ରହିବ । ତେବେ ଚଳିତ ମାସରେ ଭୀଷଣ ଗ୍ରୀଷ୍ମ ପ୍ରବାହ ଆଶଙ୍କା ରହିଛି । ଡକ୍ଟର ସାହୁ କହିଛନ୍ତି, ଏପ୍ରିଲ ୪ ଯାଏଁ ବିଭିନ୍ନ ସ୍ଥାନରେ କାଳବୈଶାଖୀ ସମ୍ଭାବନା ଅଛି । ଆସନ୍ତା ୫ ତାରିଖରୁ ବର୍ଷା କମିଯିବ । ୮ରୁ ତାପମାତ୍ରା ଦ୍ରୁତଗତିରେ ବଢ଼ିବ । ୯/୧୦ ତାରିଖବେଳକୁ ନିଆଁ ବର୍ଷୁଥିବ । ଆଭ୍ୟନ୍ତରୀଣ ଓ ପଶ୍ଚିମ ଓଡ଼ିଶାରେ ପାରଦ ୪୪-୪୫ ଡିଗ୍ରୀ ସେଲସିୟସ୍ ପହଞ୍ଚିପାରେ । ଉପକୂଳ ଓଡ଼ିଶାର ଭୁବନେଶ୍ୱର, ଚାନ୍ଦବାଲି ଓ କଟକରେ ସର୍ବାଧିକ ତାତି ଅନୁଭୂତ ହୋଇପାରେ । ୯ ତାରିଖବେଳକୁ ଉପକୂଳରେ ବି ପାରଦ ୪୦ ଛୁଇଁପାରେ । ୧୧ ତାରିଖବେଳକୁ ଉପକୂଳରେ ତାତି ଆହୁରି ବଢ଼ିବା ଆଶଙ୍କା ଅଛି ।
ଭାରତୀୟ ପାଣିପାଗ ବିଭାଗ କହିଛି, ଆସନ୍ତା ସପ୍ତାହ ଯାଏ ରାଜ୍ୟରେ ବର୍ଷା ସମ୍ଭାବନା ଅଛି । ମଙ୍ଗଳବାର ୧ ତାରିଖରୁ ୬ ତାରିଖ ଯାଏ ଘଡ଼ଘଡ଼ି ସହିତ ବର୍ଷା ହୋଇପାରେ । ସୋମବାର ଝାରସୁଗୁଡ଼ାରେ ଦିନ ତାପମାତ୍ରା ୪୨ ଡିଗ୍ରୀ ସେଲସିୟସ୍ ରେକର୍ଡ ହୋଇଥିଲା । ସମ୍ବଲପୁରରେ ୪୦.୬ ଡିଗ୍ରୀ, ହୀରାକୁଦରେ ୩୯.୯, ରାଉରକେଲାରେ ୩୮.୬ ଓ ଭୁବନେଶ୍ୱରରେ ତାପମାତ୍ରା ୩୬.୨ ଡିଗ୍ରୀ ରେକର୍ଡ ହୋଇଛି ।